Friday, March 1, 2013

බෙංගාල කොටියා (9)




පළමු කොටස්  සඳහා....
බෙංගාල කොටියා (1) 
බෙංගාල කොටියා (2)  
බෙංගාල කොටියා (3)  
 බෙංගාල කොටියා (4) 
බෙංගාල කොටියා (5)  
බෙංගාල කොටියා (6) 
බෙංගාල කොටියා (7)  
බෙංගාල කොටියා (8) 

 රළ බිඳෙන හඬ අසමින් ඔහු නිසොල්මනේ වැතිර සිටියේ ය. නැවේ  අඳුරෙන් පිරුණු යට තට්ටුවේ, ඌරන්,කුකුලන් සහ එළුවන් ගේ හඬ ඇසෙන මානයේ සිටිමින්, ඔවුන්ගේ ජීවි සිරුරුවල (සු)ගන්ධය විඳිමින්, දිනකට වරක් සිර කුටියට වැටෙන , (දු ) ගඳ හමන,  අප්‍රාණික මස් වැදලි බුදිමින්, ඔහු කුසිත කමින් යුක්තව වැතිර හුන්නේ ය.

දිනෙකට වරක් පැමිණ, අනෙකුත් "හානි රහිත"  සතුන් ගේ කුටි පිරිසිදු කරන, කාලවර්ණ දොලොස් හැවිරිදි වහලා, විස්මය සහ ගරු සම්පයුක්තබව රැඳී  නෙත්වලින්, තරමක් දුර සිටි ඔහු දෙස බලා සිටියේ ය. දහසය වසරක්  පුරාවට, බ්‍රිතාන්‍ය කිරීටය යටතේ ඉන්දියාවේ යටත්විජිත රාජකාරි  ඉටුකර, ජිවිතයේ ඉතිරි අඩ  සියවසකිනුත් අඩකට සමාන ඉතිරි කාලය, එංගලන්තයේ සසෙක්ස් හි කළු කෝපි ඇට සහ වහලුන්ගේ දියව යන ජිවිත අතරින් ගලාහැලෙන රන් කහවනුවලින් සනහනු වස් එංගලන්තය බලා පිටත්ව යන පළාත් ආණ්ඩුකාර උතුමාණන්ගේ පෙරදිග වස්තු   සම්භාරයේ  සජීවී  මාණික්‍යය මේ බෙංගාල කොටියා බව ඔහු දැන සිටියේ ය.
කූඩුවේ දොර  විවරව, වියාලයාගේ සවිමත් උල් දත් සහ නිය අතර, සිය දුබල මාංශ රහිත ගාත්‍රා වැරහැලි වීමට,  තමන් අතින් සිදුවන එක අත්වැරදීමක් ප්‍රමාණවත් බව ඔහු දන සිටියේ ය. එහෙත්, එක් නිදි කිරාවැටීමක් වෙනුවෙන්, මිටි පහරකින් තඩිස්සි වුණු හිසක් සහ, අත හරිනලද එක්  දල අහර වේලකින් තුති පුදන නැවුපතියා ටත්, කිනිසි තුඩු තුඩු තරම් කුරිරැ, තියුණු නෙතින් යුක්තව රවා බලනා ආණ්ඩුකාර උතුමාණන් කෙරෙහිවත් ඇතිවන අහේතුක බිය තරම් බියක් ඔහුට මේ මහේශාක්‍ය සිරකරුවා දැකීමෙන් ඇති නො වුණි .

සැබවින් ම ඔහු තමන් කෙරෙහි නෑ කම් ඇති සිවුපා රජෙක් මෙන් වහලාට හැඟෙමින් තිබුණි.

ගතවූ කාලය තුල සිවු වතාවක්,  ආණ්ඩුකාර උතුමාණන්, සිය ප්‍රියාව සමඟින් අඳුරු කුටියේ  අල්පේශාක්‍ය ව, බල බිඳුණු සිරුරෙන් යුතුව වැතිර සිටි සිරකරුවා බැලීමට පැමිණියේ ය. එක වතාවක් ඔහුගේ ප්‍රියාව, සිර කුටියේ යකඩ දැල් අතරට සිය සුරතින් තට්ටුවක් දැමීමට තරම් නිර්භය වුවා ය. ඔහු සිය යටි උගුරෙන් ගෙරවුම් හඬක් පිට කළේ ය. දැල්වෙන ගිනි සුලක් ස්පර්ශ කලාක් මෙන් ඇය එක්වරම පිටුපසට විසි වී ගියා ය.

ආණ්ඩුකාරය ගිනිගෙන දැවෙන නෙතින් යුක්තව ඔහු දෙස හැරී  බැලුවේ ය. මෙවර භීතියෙන් යුතුව පිටුපසට විසිවීමට සිදු වුයේ වියාලයාට ය.

දින සති ගෙවී ගියේ ය. රළ බිඳෙන හඬ සහ, අනෙකුත් "පහළ  මට්ටමේ"  සතුන්ගේ දෙඩවීම් අසමින් ඔහු ඔහේ වැතිර හුන්නේ ය. විටෙක ඔහුට සිහින  පෙනිණි. ගිනි ගන්නා හිරු රැසින් යුක්ත සුවඳති තෘණ භූමියත්,  ගින්දරෙහි කාන්තියෙන් යුක්ත දෙනෙතින් යුතු  ඇයත්, තෙත් බරිත වස්සානයේ හැන්දෑවරුවල, දිරාපත් ව මැදින් කැඩී  ගිය උන බම්බු  අතරින්, ශෝකාලාප ගායනා කරමින් ගලා යන සුළඟත් ඔහු සිහිනෙන් වින්දේ ය. කුමන ආරම්භයක් ඔස්සේ ගලා ආවත්, සිහින සියල්ල අවසන් වුයේ එකම අයුරකිනි.  පොලොව පලාගෙන මතුවන ගිනි ජාලාවන් සියලු සුන්දරත්වය ගිල ගත්තේ ය. දෙපා සතුන් ඔහු වට කරගෙන, වියරු යාගයක් ඉටු කරමින් සිටියහ.

සිහින අවසානයේ, තිගැස්සුණු, ගැහෙන හදවතින් යුක්තව ඔහු අවදි වුයේ ය.තෘණ භූමිය අතුරුදන් වී, හුදෙකලා අඳුර තුල ඔහු තනි වී සිටියේ ය. විටින් විට ඇසෙන අනෙකුත් සතුන්ගේ හඬවල් මැද, කළුවර දැව පැහැයෙන්  යුක්ත දෙපා සත්වයාගේ,   ගිලුණු, කාලවර්ණ දෙනෙත්, අඳුරු මුල්ලක සිට ඔහු දෙස බලා සිටිනු ඔහු දුටුවේ ය.

කාලය නොනැවතී ගලා ගියේ ය. එක  දිනක, රළ බිඳෙන හඬේ පැහැදිලි වෙනසකුත් සමගින් අඳුරු ශාලාවේ වහලය විවර වී, දැඩි ආලෝකයක් ගලා ආවේ ය. අඳුරට හුරු ව සිටි ඔහු,  ඇති වූ ක්ෂණික වේදනාවෙන් යුක්තව දෙනෙත් අකුලා ගත්තේ ය.

නැව  එංගලන්තයට ලඟා වීමට පස් මසක් ගත කොට තිබුණි.

මතු සම්බන්ධයි. ...



6 comments:

  1. "එංගලන්තයේ සසෙක්ස් හි කළු කෝපි ඇට සහ වහලුන්ගේ දියව යන ජිවිත අතරින් ගලාහැලෙන රන් කහවනුවලින් සනහනු වස් එංගලන්තය බලා පිටත්ව යන පළාත් ආණ්ඩුකාර උතුමාණන්ගේ පෙරදිග වස්තු සම්භාරයේ සජීවී මාණික්‍යය මේ බෙංගාල කොටියා බව...

    ..පරිවර්තන කියවල කියවල මෙතන,,,

    ගානට වැඩී දැන්.හොඳ ගානට හැදිලා නේද .bank account එකේ සල්ලි ATM එකකින් අදිනව වගේ. මේ වචන....

    ReplyDelete
  2. මට ඔය වගේම කතාවක් මතක් වුණා.මොකක්ද අර සිංහ පැටැව් දෙන්නෙක් වෙන්වෙලා එක්කෙනෙක් අන්තිමේදී පුංචි ළමයෙක් හදාගන්නවා.අවසානයේදී ඒ දෙන්නා සිංහ සටනකදි හමුවෙනවා.මාර කතාව.

    ReplyDelete
  3. පරිවර්තන කියවීම, ලිවීමේදී ලොකු සහයක් වුනා තමයි. එත් මෙතන තියෙන එක අදහසක්වත් වචනයක්වත් හොරකම් කල ඒවා නෙමෙයි. ATM එකෙන් අදින්නේ, මගේ ACCOUNT එකේ තියෙන, මම දාඩිය මහන්සියෙන් හම්බකළ සල්ලි.
    @ Sandaruwan Amarasekara.

    ReplyDelete
  4. :) බෙංගාල කොටියට නම් එහෙම මුණ ගැහෙන්න කෙනෙක් හිටියද? එයාව මුණගැහෙයි ද? ඉස්සරහට බලමු.
    @ Yasiru Udana

    ReplyDelete
  5. ඔව් ඔව් හොරකම් කළා කියල අදහස් කලේ නෑ.ඒවායින් ඔප මට්ටම් උනු තමන්ගේ ම දැනුම තමයි.ඒක වර්ධනයක් .. හැබැයි,හතලිස්දාහක් විතර එකපාර අරන් දාන්න .නැත්නම් ඊ ළඟ කොටස ආයි ත් කවද ලියයිද කියල බලන් ඉන්න වෙනවනේ

    ReplyDelete
  6. දෙපා සතුන් කොච්චර තිරිසන් සත්තු ජාතියක්ද..!!!

    ReplyDelete